Si c'est una persona a custu mundu chi tui stimas asuba 'e tottu is atras, naturali è chi siat sa mama tua: carri ses tui de sa carri sua, sangui ses tui de su propiu sangui; a issa, generosa, deppis tottu ca t'hat donau sa vida. E ndi ses orgogliosu, e ti ddu creu poita è bella e, prus ancora, è bona!
Ma, c'est un'atra mama de istimai: sa Terra aundi ses nasciu!
E bella e generosa è sa Sardigna in su mari suu chi incantad i è pulìu, in ispiaggias suas prenas de soli, in is boscus de mattas seculàris, in cudda variedadi de coloris chi ti offèrrint is froris in su tempus chi tòrrat su berànu!
Bolliddi beni a custa Terra amada, si puru tanti fillus sen'e coru cun sa cundutta insoru dda scrèditant a is ogus de su mundu
Terra nobili e forti po seculus de tantis dominada, e in dònnia modu isfruttàda finzas a i di' di, oi. Terra arricca de benis, aìntru 'e is visceras suas, de granitu pe' i montis, e de sali marinu, e tallus de bestiami seberàu: arricchèsa connòta e trascuràda sperendi in is industrias (poi faddias!). Terra de Iori e trigu giài de tempus antigu i oi terra abbruxiàda, trista e iscura!
Terra de genti bella in Campidanu, in Gallùra, in s'Anglona e Logudoru, in su Mandrolisài e in sa Barbàgia, in s'Ogliàstra i a is partis di Arborèa!
Custa e sa Terra nosta, amigu caru, e de ddi essi fillu mi ndi bantu!
E bregùngia no tèngiu, stai siguru, de chistionài su sardu: est un onori! Forzis chi si trattèninti, po nai, de usai sa lingua insoru arant'e genti is tantis siciliànus, calabrèsus, piemontesus, romanus e lombàrdus? E fètti a nosus sardus si ndi pàrit chitèi de fai cumprendi a is atrus chini sèus? E tanti bella, scis, sa lingua nosta! Lingua chi deu istimu che prenda sen'e pretziu po dd'hai sutta 'e su sinu de mama mia e tottu!
Sardigna mia, oh cantu mi ses cara, e cantu deu hia a bolli ma non creu chi poi accuda! a ti bi torra arricca: arricca de virtudis e trabballu, de paxi e de cuncòrdia e de onestadi, de cudda dinnidàdi chi t'hat fatta famosa in su passau!
SU NURAXI
(15.11.1986)
Imponenti ti ammiru in alturas, solitàriu i espòstu a tottu i' bentus, tui ses de i' monumentus su prus antigu de sa storia nosta! De perda asuba'e perda costruìu, in forma circulàri, maestòsu, de cussa storia tui ses testimòngiu e dda svèlas a nosu solu in parti, donendi, a chini circat cun rispèttu, tanti tesòrus de s'antiga edàdi, fruttu, si nàrad, de alta abilidàdi de unu populu avvesu a su trabballu.
Tra is espèrtus, chi puru hanti studiàu e funti cumpetentis in matèria, non c'est accòrdiu in tottu in custa storia, e unu ti dda nàrad in d'unu modu e un àteru, in veci, a su contràriu, e tui abàrras sempri unu mistèriu! Contasìdda, nuraxi, custa storia, ma tottu intèra, chi potzàus cumprendi de candu tui esìstis. . . chi t'hat fattu. . . a ita fiast, in finis, destinau!
Ma, tui abàrras mudu in sa campàgna, tenendudì po tei tottu is segrètus e a nòsus, indiscrètus, làssas appena de dda indovinài!
Ti saludu, o nuraxi poderòsu, chi resìstis a bentus i a straccìa, sìmbulu eternu de sa Terra mia!
COLLINAS
(12.8.1954)
Collinas no e bidda nomenàda cument'atras nci nd'hadi in terra nosta chi bèngiat de is istràngius bisitàda, ca non ci tènid a si ponni in mosta.
De collinas e tottu ingiriàda e si stèndit sa bidda a mesu costa, a destr'i a manca, casi in d'ua foràda: Forru in antigu ddi narànt apposta. E’ istèttiu un fillu, illustri deputau, filosufu, scrittori, polemista, Giambartista Tuveri nomenàu, chi, po ponni sa bidda prus in vista, su nomini in Collinas dd'hiat mudau (ma fiada stèttia cosa pagu...abbista!).
Ricca de bìngias tottu in sa costera, abbùndat s'àxia di 'onni calidàdi, i è po Collinas sa ricchesa vera ca ndi produsid in grandu cantidadi. Su binu chi, si propriu nu è barbera ca alcoolicu nu est, in beridadi, ddu pois buffai, si creis, a sa liggera, ca è durci sì, ma zuccuru non d'hadi! Binu de Forru, durci, prelibàu: candu dd'ògas derèttu 'e sa carràda ddu bis frizzanti i abàrras soddisfàu; e candu tottus, de sa cambaràda de is amigus in giru hanti buffau torras a preni e.. .sighit sa picchiada: non c'è cosa prus bella che buffai su binu a croccorìga in cambarada!
Ricca de fruttas. . . mela pira e figu e cerèsia gustosa a fin'e màju, modesta è s'arregòta de su trigu chi mai ti prènit beni su sobàju.
Su forresu de tempus prus antigu de babbu in fillu hat fattu su messàju, ma, a su presenti, calencunu amigu s'è Iaureàu e studiat a notàju; e nci hat dottoris e predis e insegnantis, insomma est una bidda progredìa.
E picciòcas, infinis, elegàntis, ammiràdas de tottu in dì nodìa, s'una pru' bella 'e s'atra, e funti in tantis, simparicàs e prenas di alligrìa!
Custu e s'omàggiu miu, su prus sincèru, a custa chi est, oindì, bidda mia puru!
BIVU... NON BIVU...
(8.5.1990)
Non sempri sèus attentus in sa vida a un bèllu esami disappassionàu de cantu hèus operàu in beni, sìad, o in mali. Eppuru hiad'essi cosa utili e sàbia de podi castiài aìntr'e nosàtrusu si tottu è regulàri e di approvai, o ddu hat cos'e curreggi in su momèntu: dònnia cumportamèntu è giustu chi si pòngiad a giudìziu po fai u'a scelta attenta e sen'e ingannu!
Sa vida mia - bregùngia è su ddu nai e ddu cunfèssu meda imbarazzàu - è istèttiu unu continuu tradimèntu, è istettiu unu continuu fallimèntu sen'e nisciuna scusa! Illùdiu deu mi seu in tanti còsas, sperendi de toccai su firmamèntu, e delusioni manna nd'happu tentu cun amargura in pettus a dònni ora. Cantu lagrimas tèngiu in mei inserràdas chi no happu prantu mai, e ddu deppìa; cantu gosu ch'hia sempri disiggiàu e m'è istèttiu negàu po trista imbidia, creu, o po rancori! E candu penzu a is annus chi oi contu mi càusat meraviglia e spantu mannu de cumenti happu tattu a nci arribbài! A Dèus grazias, oh certu, e a chi atru mai? Però un cunfortu tèngiu e mi dd'intendu chi casi stella illuminat sa 'ia: è sa cara poesia chi de su coru ndi àrziat che aqua frisca! Menti serena, coru sempri ardenti... ita m'impòrtat prusu de sa genti si mi bènit su versu genuinu?
Bivu. . . non Bivu. . . it'è, poi, sa vida? una scummissa incerta e originali fatta cun tei e tottu; e, a sa fini, chi bincit non ses tui, chi perdit non ses tui a su matèssi, ca funti is circustànzias de sa vida chi indìcanta sa fuga o sa vittoria.
Lassaimì bivi, e solu a modu miu, ca su chi è in prusu non m'e mai serbìu.
MUSICA DIVINA
(maju 1992)
Seu solu in domu e tottu est in silènziu! Puru e cun tottu seu de malumori, ca m'intèndu unu pesu aìntru aìntru, no iscìu poìta e mancu sciu cumenti! Circu sfogu in su liggi. . . non m'attìrat nemmancu sa. . . poesia! Ma, a un certu puntu, casi po abitudi, craccu unu tastu a su registradori e sa domu si prènit tott'in d'una di armonìas connotas i appretziàdas: funti certas sonàdas di òrganu sonau de manu esperta. Ascurtu cussa musica divina, chi sa menti de Bach had inventau e m'intendu portau in d'unu mundu divèrsu e pru' gradèssiu! Ascurtu e penzu. . . e is penzamentu' miusu si faint issus e tottu atra musica e, a pagu a pagu, casi in sintonia, agàtu torra cudda paxi mia chi po unu momèntu si fiad appannàda!
O musica divina, sempri cara, m'accumpàngit su ritmu tuu po sempri ca ses gosu e paxi e sentimèntu, ses vida, ses amori e ses cunfortu, ses caparra di atras armonias chi no hant a tenni fini!
SU DINAI NU E' TOTTU
Sa vida 'e s'homi, certu, nu è tranquilla ca po natura sua nu è mai cuntèntu: si tènit dexi. . . nd'hiad a bolli centu, si tènit centu... nd'hiad a bolli milla! E meda genti crèit, ma crèit diaderu chi cun su 'inai si pòid ottenni tottu! Po su chi scìu, po su chi happu connottu deu si dimòstru, pròpriu, ca nu è bèru.
Ma penza a sa saludi, po essi craru: pois essi prenu a istìbba de dinai. . . candu non c'esti. . . non c'è nudda 'e fai: non tènit prètziu custu donu caru! Po ndi torrai in possèssu spèndis puru, cantu prus prusu, in terra nosta i allèna, ma est a s'illudi in sa propriu pena ca è cumenti a arrebussài un muru!
Penza a s'intelligènzia, cara genti: si Deus non ti dd'hat giàda de natura pois possidì dinài sen'e mesura ma hast'essi, sempri prus, conch'e mobènti! Calencùna persona facultosa chi po intelligènzia non brillàda u'a làurea si dd'è puru pricuràda cun proceddus, angiònis i atras cosas... ma crei, de su chi funti, fora' mali, no ndi èssint affattu, manc'a piccu: su essi tontu, mancai meda arriccu no càmbiat nudda, i è cosa naturali!
E, un'atra cosa non si poit comprai: non c'è ricchesa, non c'è bona sorti chi potzat ponni ostàculu a sa morti, e, candu bènid... è chistio'i di andai!
SU SPRIGU
(5.5.1987)
No mi cumpràxiu mai de mei e tottu ca bellu no ddoi seu mancu po brulla; però a su sprigu, a bortas, arrecùrru ma spintu sempri de necessidàdi e mai po vanidàdi cumenti fàinti certus chi connosciu! Ma c'esti sprigu e isprigu, e a un atru sprigu mi pràxit donnia tanti a mi castiai: è cuddu sprigu chi donniun de nosu pòrtad in sei de candu, piticchèddu, hat cumenzau, sa menti a arrexionài: è sa pròpriu cusciènzia, in bona fidi, chi è giugi e de mèritu e de pena; si ddoi càstias appena bis de sa vida tua su svolgimèntu, is òperas chi fais bònas e malas, appròvat cussa' bonas e un rimòrsu ti fàid intendi si has cummìttiu sbàgliu! Mira chi siat però e limpia e pura e libera de dònnia pregiudìziu po chi, cussu giudiziu, non siad ingannu o, pèus ancora, errori. Una cusciènzia a postu et onoràda ti fàit bivi sa vida in onestàdi, attentu, sempri e in tottu, a su dovèri, e sa stima ti attìrad de sa genti. Castiadì, duncas, sempri prus frequènti, a custu sprigu chi non fàddit mai; cura ndi tèngias po no s'annappài e scippiast ascurtai is conzillus susu po essi illuminàu in su camminu chi ti bit peregrinu in custa terra prena di amargura.
S'AMICIZIA
(15.10.1989)
Cantu gosu deu provu si un amigu chi sciria mali postu de saludi, m'arrespùndit, prexiau, a su telefunu, ca gi è sanau e, forzis, cantu prima spèrad de m'incontrai e podi arrexionài de tanti e tantis cosas chi si spùttinti. Su prèxiu suu è, credèi, su prèxiu miu, cumenti is penas suas ddas intendìa puru in sa carri mia casi chi is duas personas fessint una!
E’ bella s'amicizia candu è bella, candu è sincera e disinteressàda, candu è tottu passiènzia e mai indiscreta; non traìscit, non màncad di arnspèttu; difèndid, issa, in dònnia circustànzia, e scusat sa mancànzia cummittia sen'i òdiu e sen'e ingannu; e un aggiudu non nègat, voluntàriu, privendusì, si occurrit de sa vida!
Narad un diciu antigu chi, si è sincèru, s'amigu si connoscid in s'ora 'e s'abbisòngiu!
Cantu è rara, oindì, custa amicizia! Si dd'agàtas, però, non tènit pretziu ca bàllit cantu bàllit tottu s'oru e agàttad un tesoru chi agàttad un amigu verdadèru; e tenididdu caru appuntu poita è raru: poid essi poi chi no nd'agàttis prusu!
ANIMU CONTADINU
(24.8.1982)
Su carignu 'e s'arrosu a sa campàgna candu su contadinu, a su mengiànu, bàndat a su trabbàllu speranzòsu, o in circa di arriposu tòrrad a su merì a domu sua; e candu a su tramontu s'abèrrid a sa notti un frori istrànu, o vàgada una lucciola pe is campus, ripòrtant a sa menti prus pensosa sonnus de vida sana i operòsa, de trabbàllu chi è sacru testamèntu, fattu de gestus semplicis i egualis, de fatiga chi in sei si trasfigurada e pèrdit, si no in tottu, bona parti sa materialidàdi chi è immanenti!
E su croppu 'e sa marra vigoròsu si càmbiad in d'un toccu dilicàu; s'innèstu cun perizia praticàu, è tottu unu miràculu di amori; e sa forza potenti de unu semi de s'aberri sa ja in dura terra po conquistài sa luxi de su soli, mi làssant incantàu, prenu de ispàntu chi mi mòvint a un cantu a cudda Provvidènzia chi tottu cantu règgid in su mundu!
Su contadinu est tottu, oi, distraìu de tanti novidàdis de sa vida, i hat pèrdiu custu arcanu sentimèntu: no ddu biu pru' cuntentu girendu pe i' giualis de sa bingia o pe is terras de trigu seberàu ca bid in su trabballu sempri eguali sa parti materiàli sen'e nci ponni appena appena amori! Po parti mia, si custu è su destinu, m'happu a isforzài e, nau, po cantu bivu de tenni sempri vivu s'animu contadinu!
A CUNTATTU CUN SA NATURA
(4.12.1986)
S'è sempri scìppiu e dd'arripìtu ancora ca seu un innamoràu de sa natura; m'è pràxiu sempri, finza' chi happu potziu, girài pe is sattus, aicci, po dilèttu, tanti chi calencunu, scherzosamenti, mi domanda' si fessi barracèllu o appretzadori!
Deu connoscìa su sattu a pramu a pramu, de dònnia zona ndi scirìa su nomi: de Barradèli a Bruncu 'e su mudègu, de Canaùdu a Màrgini sa mola, de Mitza franca a sa Corona arrubia... Cantu mengiànus, prim'i andai a iscola a friscura a friscura, mi nci 'essia candu non fiat bessìu mancu su soli! E ddu biria spuntai a pagu a pagu, e, a sa luxi 'e su soli, tottu s'erba, pe is terras e i mràxis, arrosiàda, tottu cantu brillada
de tanti perlas, a su naturali, e, in d'un xèlu pru' limpiu e prus serenu arriflettìanta - e fiad un veru incantu - tottu is coloris de s'arcu balènu! Non c'è cosa pru' bella chi osservai su soli chi cumpàrrid a s'orienti e, meda lentamenti, si pèsad, donnia cosa a illuminai!
I àtras cosas nòbas deu birìa de s'urtim'orta chi ddoi fia passau: s'aràgna ch'hiad intèssiu a fini a fini sa tela sua in d'una matt'i arru... calencunu sitzigòrru a sa pastura, e tùvara agattàda po iscoffènzia! Deu ascutta' su cantu de is pillonis: fadianta festa, certu, a modu insoru ca un'atra dì po issus cumenzada!
Ma custas i atras cosas deu osservu e biu, e intendu boxis sempri arcànas, boxis de sa natura trascuràda i oi prus che mai inquinàda de sa perversa voluntadi umana!
SCENAS CAMPESTRIS
(1.12.1986)
In d'una terra di erba bella e frisca pàscid un tallu de brebèis angiàdas, e mi torrad in menti su presèpiu chi fadiàus in domu, picciochèddus, e non mancànta mai is angioneddèddus postus accanta a su Gesù Bambinu! Ma intendu immui su bèbidu accoràu de is mamas po s'angioni scamminàu; ma is angiònis unìus tottus impàri giògant a parti, a candu brinchiddendu o currulèndusì s'unu cun s'atru, bebèndu cun d'un bèbidu argentinu sen'e pensai, de certu, a su destinu chi ddis risèrvat s'ingordìgia umàna!
E, prus a innàntis, in d'una terra crua intendu su burdèllu de un trattori chi àrat sa terra po dda manixiài e po ddoi seminài o trigu, o lori o vèccia po pastura. A is ogus mius scumpàrrit cudda scena de bois masèdus giuntus a s'aràu, e, in mesu a su silènziu misteriòsu de sa campàgna estèndiu a s'orizzonti, sa boxi s'intendìad de s'aradori po chi tenèssint un passu pru' veloci! Oi tottu cantu s'è meccanitzàu, ma disumanitzàu, si de s'arìngiu fi'as a s'arregòta sa manu 'e s'omi s’è ridusia appena a tirai lèvas i a girai volàntis!
In d'una bingia posta facci a soli su bingiatèri pudat su sramentu: duas o tres pèttias làssad, e non prusu, po chi su fundu aquìstit prus vigòri e su produttu siat prus abbundanti. Sa bingia, pu essi bella, dd'òit curàda dd'òidi scràtzàda, e a pustis dd'òid aràda, e trattàda cun lìquidu adattàu po dda salvai de dònnia maladia. Su trabballài sa bìngia còstat caru, ma, a cabudànni, si ndi bit su fruttu, e candu è ànnada bella nd'è cuntèntu su bingiatèri chi nd'hat tèntu cura, ca creid in sa natura, chi nu est susunca, no, si est aggiudàda e, asuba 'e tottu is còsas, si est amàda!
NON SEU NOBILI!
(15.5.1990)
Non seu duca, nè conti e nè marchèsu, nemmancu seu avvèsu a serbì is pastus in pratus de laccìnu, cun frocchittas, cullèras e gotèddus e cun cocciorinèddus fattus tottu de prata! Tiàllas ricamàdas a puntinu lassàdas de mammai po testamèntu. . . non fòrmat omamèntu a sa mesa chi attèndit s'invitàu! Tottu è comunu in mei: ma penza ca non tèngiu su prexèi, si mi occùrrit, di andài in gabinèttu mancu de fai in d'un vasu filettàu di oru!. . .
in prus no mi cunfòrtat, po digràtzia, u'aspettu govanili in sa persona! E po cantu mi càsti me in su sprigu custa facc'i ottigu. . . no mi dda càmbiat nemus. Sa misèria! Peccau chi tra is parèntis di atrus tempus no nd'èssidi unu donu po eccellèntzia: gei nd'hia a tènni 'e prèxiu, nci scummittu! Seu nàsciu pobenrittu, custa è sa beridàdi!
Ma tra is antigus mius, a su chi sciu, c'e istèttia genti nòbili, siguru, ma nòbili pero in su trabballu! M'accuntentu de custu e seu a postu: mèllus pòburu onèstu e rispettàu chi essi nòbili fèttu e spiantàu! Ah. . . Ah!
SU FOGU E SU TZIGARRU. . .
(8.12.1979)
Frigànta tres picciòcas in s'arrìu in d'una dì de forti cibixìa; nisciùna chi èssit nau: “Ah, titìa!” in tanti frìus chi azzuzzuddà su piu.
Cun sa bèttua a coddu e impriutzìu pàssad un para e nad: “Avimmarìa! Cumènti àndat, picciòcas, sa lissìa? Ma.. .deppèis tenni frìus, a parri miu!”.
“Nossi, su para, nossi; francamènti su frius non si pròvocat catarru ca potàus un certu fogu e... fait callènti!” “Incantàu - fait su para - deu m'abàrru a cussu fogu, aicci bèllu i ardènti, fadeimì allùi su. . . zigàrru. . .!”
SA LEGGENDA DE SU DEVANTAGLIU
(12.12.1979)
In su tempus chi i' bestias in sa terra non tenianta ancora un nomi insòru, po conquistài de s'òmini su coru a chi pru' prusu si fadìanta gherra.
Nd'hiad una, ma non tra is importàntis, u'animabèddu tottu cou, piùdu, a orighèddas allùtas, mustatzùdu, chi non tenìada assèbiu, in mès'e tantis. . .
Unu vitziu tenìada deppu acciùngi: si òlliad in co' e is fèmmias solamenti: s'accugucciàda beni in su callènti, de ingùi no si movìa' mancu a ddu pungi!
De nci ddu stratallài fadìa' de tottu su Magu chi guvèrna' custu mundu: issu si nci sticchìada prus a fundu e, furbu furbu, si fadìada a mottu!
Su Magu dd'hiad arròxiu, i ha' sentenziàu: “Giài chi ses bèstia maba e iscundìda ingùni has a abarrài po tottu vida, mai de sa fèmmia hast'essi separàu.
E, po pagai su dannu provocàu a tenni sempri fami ti cundànnu, finzas a candu, murru e fattu mannu, t'has a inserrài in tei allaccanàu!
Custa è sa vera e santa beridàdi, e ti assiguru deu, su grandu Magu, ca t'hant a istrappatzài meda e non pagu, e Topi t'hant a nai in eternidadi!”
Fiat su topi, lettori, e non mi sbàgliu. E, po protèggi, infinis, cussa prenda, sigundu su chi nàrat sa leggenda, sa fèmmia hiad inventàu su deventàgliu!
